Aizawl, the 25th April, 2024: Social Welfare and Tribal Affairs Dept., Govt. of Mizoram leh SELCO Foundation (SF) te chuan state chhunga Decentralized Renewable Energy (DRE) hmanga livelihood sector tih hmasawn nana thawhhona tha leh zual an neih theih nan vawiin (25th April, 2024) khan Aijal Club-ah meeting an nei.
Dr. Lalhriatzuali Ralte, IAS, Director, Social Welfare and Tribal Affairs chuan he hun hi hman puiin, Dr. R.Lalnunmawii, Deputy Director, SW&TA leh PB.Lalrinfela, Project Operation, Manager, SELCO Foundation ten sawihona hun an kaihruai a, hei bakah hian, mi pawimawh hrang hrang ten thusawina hun an nei nghal bawk a ni.
Dr. Lalhriatzuali chuan department schemes, policies leh programmes awm tawhte nena DRE solutions hmanga eizawnna tihchangtlunna kawnga hlutna belhchhah theih dan turte a sawi a, Directorate of Social Welfare & Tribal Affairs hnuaiah rualbanlote leh hmeichhe chanhai leh rahbi tleute tan puanthui zirna a awm thu sawiin, heng an puanthui khawl hmanga solar energy hman tura hmalak kawngah leh training centre tihchangtlun kawngah SELCO nena thawhho a beisei thu a sawi.
He Directorate hnuaiah vek hian Tribal Research Institute (TRI), Kelsih chu hman theih tepin a awm tawh a, helai hmunah pawh hian Solar Energy an mamawh tur thu a sawi bawk. Tin, tun sawrkar thara Hand-holding policy hnuaiah hmachhawp hrang hrang an neih thu a sawi a, chungah te chuan Phunchawng leh Rangvamual bawra ‘Mission Chhanchhuahna’ Sawrkarin bul a lo tan tawh chu chhunzawma, heng ruihhlo ngaite, Jail tang chhuakte tana thiamthil pek dan tur an duan mek thu a sawi bakah Smart Tribal Village- thingtlang tihchangtlun dan tur an duan mekte a tar lang nghal bawk a ni.
He hunah hian Pu Lalnuntluanga Colney, State Lead, SELCO Foundation (SF) pawhin thu sawiin, "State chhunga eizawnna tihchangtlunna leh boruak inlumlet tih ziaawmna kawnga Sustainable renewable driven approach pawimawh zia a tar lang bawk a ni. Hei bakah hian Usma Chakma, Project Manager, SELCO Foundation chuan, "SELCO Foundation hian tlawmngai pawl leh Sawrkar department-te nen thawhhona tha tak neiin Mizoramah hmalakna engemawzat hlawhtling takin an kalpui tawh" a ti. He hunah hian sumdawnna lama DRE Solution (Solar Sewing Machine) hmang tawhte hnen atangin an experience te ngaihthlak a ni bawk.
SELCO Foundation hian kum 2023 January thla khan Mizoramah bul rawn tanin, hmathlir lian tak a nei a chungte chu -Mizorama eizawnna lama harsatna awmte sutkian nan Renewable Energy (Solar) hmangin Livelihood Sector hrang hrang te- Lo neih, ran vulh leh sumdawnna tenaute tih hmasawn a ni. SELCO Foundation hian Mizoram district zawng zawngah nasa takin hma a la mek a ni.
Pi Zomuanpuii, Assistant Director, SW&TA chuan lawmthu sawina neiin, he hun hi a khar a ni.
A buatsaihtute chanchin hrechiang duh tan a hnuaia tar lanah te hian belh chian thei a ni:
-SELCO Foundation: selcofoundation.org
- Social Welfare & Tribal Affairs Dept
Attachment
