PRESS RELEASE

          Siaha DSWO huam chhung, Sangau, Tuipang, S. Bungtlang, Siaha, Chawngte leh Siaha Block-a NSAP hnuaia Pension la ten harsatna an tawk tih sorkarin a hria a. Harsatna an tawhna chhan chu hetiang hi a ni.

Kum 2017 hmalam kha chuan Upa Pension, Hmeithai Pension leh Rualbanlo Pension te hi Autonomous District Council hnuaia awm chu an mahni District Council theuhah sum transfer thin a ni a, sum faiin an la mai thin. Government of India hian Direct Benefit Transfer (DBT) in Pension hi pek tura a tih tlat avang leh nawrna a nasat si avangin beneficiaries te Account hawnga in report tura tih a ni a. Beneficiaries ten an account an report a, chutah chuan March, 2017 thlenga an pension thun sak tan a ni ta a. Tha takin an dawng emaw kan tih laiin thenkhat ten an account-a a luh ve loh thute, a then a double-a a luh thute dawn a ni ta a. Tin, beneficiaries thenkhat mahni account nilo report te an awm bawk a. Department-in a han chhui chian deuh hnuah chutiang thil chu alo tam mai tih hmuh chhuah anih avangin, a hnua pension an dawn tur pawh chu hemi account lut diklo hi chinfel a nih hma chuan a thun zui ngam ta lova. Hemi chingfel tur hian nasa takin Bank te nen tangrualin hma ala zui ta zawk a ni. An pension lak tur March, 2018 thlenga an lak loh zawng zawng hi he thil buai chinfel a nih veleh thunsak tum a ni a. Power supply a that loh avang leh Internet-te a that tawk loh avangin duh angin hmalak chak a harsa a; amaherawhchu, a rang thei ang bera chinfel thuai tum a ni. Pension la-te dawhthei taka min lo ngaichanga min lo hrethiam turin kan ngen tak meuh che u a ni e.