Release Date: 2016-12-07 18:30:00
Mizoram Legislative Assembly chuan ni 7.12.2016 khan Mizoram Drug (Controlled Substances) Bill, 2016 chu lungrual takin a pass a,
Social Welfare Minister P.C. _’n he bill hi putlutin he dan thar hi, tuna ruihhlo zuar leh tawlhtutute hremna dan hman mek, Narcotic Drugs and Psychotropic Substances, NDPS Act 1985 aia khauh zawk leh awlsam zawka hremna lekna tur dan a ni a, ruihhlo hmangsualte hremna na zawkin a siam dawn a, ruihhlo hi ramchhunga dan anga siam pawh nise hmansual anih phawt chuan hrem theih a ni dawn a ni.
Pu _ chuan, NDPS Act hnuaiah ruihhlo kaihhnawiha mante hremna a nat theih loh bakah, a harsat avangin hrem loha chhuah tam tak an awm tih sawiin, he dan thar hnuaiah hi chuan, court-a tihtur hrang hrang awlsam zawk leh dan bawhchhetu, man tam zawkte thiam loh chantir ngei an nih theihna turte danah hian khung a ni dawn a, damdawi pangngai anga hman thin, state chhunga hmuh mai theih hmangsual leh zuarte man theihna turte pawh telh a ni, a ti.
Drug ngawlveite tun aia tha zawka enkawl an nih theih na tur te pawh danah hian telhin, heng mite enkawlna hmunte chu sorkar hriatpuiin ngawlveite enkawl nan hman tangkai an ni ang, Minister chuan a ti bawk.
Dan thar hman a nih hunah state sorkar chuan a tul hrang hranga hman atan kum khatah Cheng Nuai 95 a sen a ngaih tur thu pawh Minister hian a sawi bawk.
