Aizawl, the 11^th July, 2024 : Social Welfare & Tribal Affairs, Women and Child Development enkawltu Minister Pi Lalrinpuii’n vawiin khan Vaivakawn Cultural Centre Auditorium ah Mizo lal huaisen Zakapa Fanai nun behchanna  docu drama film siam chu a tlangzarh a, he film hi Directorate of Social Welfare & Tribal Affairs hnuaia awm State Tribal Resource & Training Centre (TRI) tanpuina in film siamtu Pu TC Vanlalzauva, Orientation Media siam a ni.

Minister Pi Lalrinpuii chuan Mizo Lal huaisen leh ropui, a khua leh tui leh Mizo hmeichhia te zahawmna leh dikna humhimtu chanchin, documentary film a buatsaih a ni chu lawmawm a tiin Mizo ten hnam hmangaihna lama min thanharh tir leh tu atan leh midangte tana malsawmna lo ni thei se tiin a duh thu a sawi a. Vawiin hi Mizo te hnam anga kan lo than chhohna-ah leh khawvel hriata chhinchhiah kan lo nihna kawngah bung thar kan kai atih theih awm e tiin Mizo Lal ropui Zakapa chanchin kan ngaihthlak atang khan Mizo khawtlang nunah leh ram leh hnam hmathlir kan neihna-ah hian tute hian nge tihtur nei a, eng nge an tihtur tih te hi hriattur a tam hle nia a hriat thu a sawi a.  Hotu leh hruaitu tha pawimawhzia chu Lal ropui Zakapa chanchinah a chiang hle nia a hriat thu a sawi bawk a ni.

State Tribal Resource & Training Centre hnathawh leh hmalakna thenkhatte sawiin Pi Lalrinpuii chuan kan hmalakna tur a zauh em avangin State Tribal Welfare & Development Policy neih chu tha kan ti a, policy hi tunah duan mek a ni a, peihfel anih hnu chuan he policy hmang hian ‘Revamped TRI’ kalpui a, chumi hmanga thalai tam zawk tan kawng zawh tur kan siam belh dawn a,  a ti a. Hei hi Sawrkar flagship program Bana Kaih nen rem takin a kal (Converge) dan kawng zawn anih tur thu a sawi bawk a ni.

Hun kaihruaitu Director, Social Welfare & Tribal Affair Dr. Lalhriatzuali Ralte chuan Mizo lal ropui leh huaisen chanchin leh nunah Mizo hmeichhiate zahawmna humhim ani thei nan a lalna leh a nun pawh dah tha a, an tana Kumpinu Sawrkar a do kha a ropui a, thangthar ten a chanchin hi kan hriat a pawimawh hle a ni, a ti. Lal Zakapa nun, a chanchin leh hmeichhia te tana Kumpinu Sawrkar a do dang tlangpui  chu Padma Shri Prof. RL Thanmawia chuan a sawi a. Film siam dan leh chan dan tlangpui chu he film siamtu Pu TC Vanlalzauva chuan a sawi bawk a ni.

Film tlangzarh a nih hnua hian sawm bikte tan film hi chhuah (premiere) a ni a. Programme ah hian MLA rual 5 an tel a, MZU History leh Mizo Department-te zirlai leh zirtirtu bakah Zakapa Fanai thlah mi engemaw zat an tel bawk a ni.

Film hi zanin atangin thla 10 chhung atan Runmawi App ah man chawia en thei turin dah a ni dawn a, he film hi Mizo history behchanna siam anih avangin a hlu leh zual a ni.