3rd December , 2025
Lunglei District Social Welfare Office hmalakna hnuaiah vawiin hian Onyx Special School-ah International Day of Persons with disabilities hman a ni.
Lunglei District Social Welfare Officer Pu C L Joseph chuan "International Day of Persons with Disabilities hi kum 1992 atang khan United Nations chuan kum tin December ni 3 ah hman turin a ruahman a.
He ni kan hman chhan ber chu mipui nawlpuiin vohbikte dinhmun leh harsatna an tawh kan hriat thiampui theih nan te, an dikna leh chanvo humhalhsak a, nunphung pangngaia an nun ve theih nan tanpuina hrang hrang ruahmansak te a ni a.
Tunah hian ram pumah Rights of Persons with Disabilities Act 2016 chu hman mek a ni a. He act hnuaiah hian Vohbikte tan zirna in sang zawkah zaah panga ( 5 %) a hauhsak te, sorkar hnaah zaah pali ( 4 %) a hauhsak te, poverty alleviation scheme ah zaah panga ( 5 %) te , sorkar building-ah leh zirna inah awlsam zawka an lawilen ve theih nan ruahmanna siamsak te a tel a ni.
Social Welfare Department pawhin vohbikte tan hmalakna hrang hrang a kalpui mek a. Lunglei District Social Welfare Office atang pawhin tunah hian Vohbik 103 hnenah IGNDPS thla tin Rs. 1300/- theuh a pe mek a, State Disability Pension Scheme hnuaiah Vohbik 28 hnenah kum tin Rs. 6000/- theuh a pe mek bawk a, Vohbik zinga lehkha thiam, District employment exchange ah in register te hnenah unemployment allowance a pe bawk a. Vohbikte tan puanthui leh peikhawk chhe siam zirna Training Centre for Specially Abled Persons chu Lunglei ah kalpui mek niin, zirlaite hnenah thlatin stipend pek thin an ni a, an zir zawhah puanthui khawl leh pheikhawk chhe siamna hmanrua pek thin an ni ” a ti a.
Pu C L Joseph chuan MHIP Sub headquarters, Lunglei ten vohbikte tan zirna in tha tak an din thei chu fakawm a tih thu te, District Social Welfare Office-ah an harsatna te thlen ve thin tur leh an theihna zawnah tanpui an inhuam reng thu a sawi a.
He hun hmanna ah hian Lunglei MHIP Sub Headquarters Finance Secretary leh Onyx Special School Principal ni bawk , Pi Vanlalpianpui'n kaihruaiin, Onyx Special zirlaite, Traning Centre for Specially Abled Persons zirlaite, vohbik sawmbikte leh MHIP Sub Headquarters hruaitute an tel a ni.
 |  |  |
